Ai thotë se kjo është zgjidhja më e mirë tash për tash dhe si shpërblim, Kosova do të njihej nga Serbia dhe nga pesë vendet e Bashkimit Evropian.

Pos ndarjes, ai përmend shkëmbimin e territoreve, Lugina e Preshevës t’i bashkohet Kosovës, e veriu i Kosovës Serbisë, për një zgjidhje të qëndrueshme në Ballkan.

“Jam i bindur që në fund të fundit nëse asgjë nuk do të jetë e mundur, atëherë ndarja është zgjidhje”, ka deklaruar Busek, raporton Koha.

Ai ka folur edhe për bisedimet Kosovë-Serbi të ndërmjetësuara nga Bashkimi Evropian që sipas tij vetëm pas zgjedhjeve në Serbi do të krijohen kushte të favorshme për zhvillimin e bisedimeve.

Veç kësaj kam theksuar nevojën për një plan afatgjatë dhe inkluziv për veriun e Kosovës, ndërsa komisioni është i gatshëm që të ofrojë ndihmë teknike dhe financiare për këtë përpjeke, ka thënë Fuele, njoftohet në komunikatën nga Zyra e tij në Bruksel, transmeton gazeta serbe Blic.

Komesari evropian, po ashtu, ka theksuar se është me rëndësi qenësore që marrëveshjet e deritashme të zbatohen. Ai, sipas medieve serbe i ka thënë Jahjagës, se perspektiva evropiane e Kosovës varet, para se gjithash nga autoritetet e Prishtinës.

Fuele është takuar me Jahjagen, sipas medieve serbe, në margjina të konferencës për sigurinë në Munih.
***************
Presidentja e Republikës së Kosovës, zonja Atifete Jahjaga, po merr pjesë në ditën e dytë të Konferencën së 48-të të Sigurisë e cila po mbahet në Mynih të Gjermanisë. Në këtë Konferencë merr pjesë dhe Kryeministri i Shqipërisë Sali Berisha.

Në punimet e paradites me kumtesat e tyre u paraqitën Sekretarja Amerikane e Shtetit Hilary Clinton, Sekretari i Mbrojtjes së Shteteve të Bashkuara Leon Panetta si dhe sekretari i NATO-së Anders Fogh Rassmusen.

Presidentja Jahjaga, në kuadër të Konferencës do të takoj përfaqësues të vendeve të ndryshme pjesëmarrëse dhe gjithashtu edhe të Gjermanisë.

“Kjo është Konferenca më e rëndësishme vjetore që bëhet në kuadrin e sigurisë euroatlantike. Në këtë Konference, siç njoftoi organizatori i saj, ish-sekretari i shtetit të Republikës Federale Gjermane diplomati i njohur Ischinger, marrin pjesë delegacione të 70 qeverive nga Europa, SHBA, Kanada dhe vende të tjera të planetit. Në tërësi Konferenca trajton çështje të sigurisë euroatlantike dhe globale. Ajo që ishte me interes te veçantë për mua ishte fakti, se kësaj here, tema e diskutimit ishte përqendruar tek energjia dhe siguria.
Shqipëria është një vend me potenciale të mëdha, por është një vend gjithashtu, të cilën duhet se do të kalojnë dhe gazsjellës të mëdhenj, që do të sjellin gazin Kaspik drejt Evropës. Ndaj dhe e konsiderova shumë të rëndësishme këtë seancë. Bisedova me faktorë kryesore siç është presidenti Azerbajxhanit, ku unë së shpejti do të kem një vizitë zyrtare në këtë vend mik, por dhe me faktorë dhe me përfaqësues të tjerë të rëndësishëm në fushën e energjisë.

Topalli dhe Ahmeti kanë folur me pjesëmarrësit në oborrin e shkollës dhe u kanë premtuar se do të kthehen sërish te i njëjti vend për të mbajtur tubimin

Megi Jokiçi me të fejuarin Granit Ribaj

Granit Ribaj: Po prisnim në makinë kur qëlluan.

I fejuari i Megit: Nga tronditja nuk munda të shoh kush qëlloi.

Atentati te “Komuna e Parisit”, dëshmia në Polici nga i fejuari i 24-vjeçares.

Personi i parë që është marrë në pyetje nga policia në lidhje me vrasjen aksidentale të 25-vjeçares Megi Jokiçi, ka qenë i fejuari i saj, Granit Ribaj.  Ai ndodhej në makinën e të fejuarës së tij në momentin kur ndodhi ngjarja e rëndë. I riu nuk arriti dot të shihte asgjë se kush po qëllonte apo çfarë po ndodhte jashtë makinës, në zonën te “Komuna e Parisit”. Në këtë kohë, ai ka qenë duke u kujdesur për të fejuarën që ishte gjakosur nga goditja me një plumb në nofull në një skenë krimi me të cilin nuk kishte asnjë lidhje. I fejuari i 24-vjeçares ka treguar për policinë se në vendin ku ndodhi atentati, që ishte destinuar për një tjetër person, vajza e re ndodhej fare rastësisht. I fejuari ka thënë se me Megin kishin shkuar të merrnin një kushëririn e tij bashkë me një shoqe, e më pas të katërt do të dilnin të pinin një kafe së bashku. Granit Ribaj ka treguar se makinën e kishte drejtuar Megi deri aty dhe ajo ndodhej në ndenjësen e shoferit në momentin kur u qëllua nga një plumb. Ai vetë ndodhej në ndenjësen e parë të makinës tip “Mercedes A Clas”, me targë TR 3134 R. Përveç shpërqendrimit dhe tensionimit në momentin kur është plagosur e fejuara e tij, faktin që nuk ka arritur të shohë asnjë person të dyshimtë apo me armë, Ribaj e shpjegon duke treguar se para se të fillonin krismat, ishin kthyer të dy me kurriz nga xhami i përparmë i makinës. “Kur dëgjuam të shtënat, u kthyem të dy përpara që të shihnim se çfarë po ndodhte. Por nuk arritëm të shihnim asgjë, pasi në një moment u ktheva të shoh Megin dhe pashë që po i dilte gjak”, ka deklaruar për oficerët e Policisë Gjyqësore 25-vjeçari Granit Ribaj. Burime nga Policia e Tiranës thanë se nga deklarimet e të fejuarit të viktimës Megi Jokiçi, por edhe nga dinamika e ngjarjes, rrethanat dhe shpejtësia e kryerjes së veprimeve, rezulton që i riu nga Vlora, banues në Tiranë, nuk ka parë asnjë person të dyshuar. Ai nuk mund të përshkruajë asgjë nga skena e ngjarjes në lidhje me autorët, pamjen e tyre, pasi nuk ka parë asgjë. Këtë ai e shpjegon me faktin se në momentin kur ka parë të fejuarën që ishte e gjakosur, është tronditur dhe ka nisur të kujdesej për të, pavarësisht se nuk po arrinte t’i ndalonte dot gjakderdhjen.
Pyetje: Ku ndodheshit në momentin kur u plagos e fejuara juaj?
Kishim vetëm pak minuta që kishim parkuar makinën para një kazinoje. Aty po prisnim një kushëririn tim, i cili do të vinte bashkë me një shoqe të tij. Ai e ka shtëpinë afër vendit ku kishim parkuar makinën. Pasi të vinin ata, do të iknim të pinim kafe, po nuk e kishim përcaktuar ende se ku, në çfarë vendi.
Pyetje: Gjatë kësaj kohe keni zbritur nga makina?
Jo, jo. Nuk kishim zbritur. Vetëm disa minuta kishim që arritëm aty, orën nuk e mbaj mend fiks se sa ishte. Po e prisnim brenda në makinë që të vinin ata të dy, kushëriri im bashkë me shoqen e tij.
Pyetje: Si ishit ulur në makinë?
Megi ishte në timon, ndërsa unë isha në sediljen e parë.
Pyetje: Patë ndonjë lëvizje të dyshimtë rreth makinës ku ishit para se të fillonin të shtënat?
Asgjë. Në momentin kur dëgjuam krismat, unë dhe Megi ishim kthyer me kurriz nga xhami i përparmë i makinës, drejt sediljeve të pasme. Po rregullonim diçka që të uleshin ata të dy kur të vinin (kushëriri me shoqen).
Pyetje: Çfarë kujtoni në atë moment? Sa të shtëna dëgjuat?
Kur dëgjuam të shtënat, u kthyem të dy përpara që të shihnim se çfarë po ndodhte. Por nuk arritëm të shihnim asgjë, pasi në një moment u ktheva të shoh Megin dhe pashë që po i dilte gjak. Nuk mund të them sa të shtëna, sepse nuk kujtohem dot tani.
Pyetje: Pra, ju nuk arritët të shihnit çfarë po ndodhte jashtë?
Nuk mund të shikoja më jashtë, pasi u trondita nga Megi dhe po përpiqesha ta përmendja, të shihja a ishte mirë, por pashë që ajo po mbulohej me gjak dhe gjaku nuk pushonte. Nuk po ia ndaloja dot. Menjëherë fillova të kërkoja ndihmë, s’po e kuptoja se çfarë po i ndodhte dhe përpiqesha ta nxirrja nga makina. Në një moment njoftova policinë dhe pastaj Megin e kemi çuar në spital me një makinë policie.

“Vrasësi i Megit, me kapele”

Plumbi e kapi 25-vjeçaren në kohën kur po priste në makinë me të fejuarin

Sulmi te “Komuna e Parisit”, për të riun nga Mati

Dje gjate funeralit per 25-vjeçaren e vrare te “Komuna e Parisit”

Vrasja e 25-vjeçares Megi Jokiçi ka qenë krejtësisht rastësore, pasi ajo nuk ka pasur asnjë lidhje me atentatin e ndodhur te “Komuna e Parisit”. Policia dhe Prokuroria e Tiranës pohuan dje se shtetasja 25-vjeçare që humbi jetën nga një plumb në nofull është ndodhur në momentin dhe vendin e gabuar për fatin e keq të saj, pasi atentati ka pasur si objektiv shtetasin Aleksandër Gocaj. Ky person, që sipas hetuesve ishte kontingjent policie, ndodhej në një fuoristradë me dy persona të tjerë kur ndaj tij është hapur zjarr. Grupi i hetimit, nga dëshmitarët dhe kamerat e sigurisë së disa bizneseve në vendin e ngjarjes, ka mësuar se rreth orës 21:30, një person ka zbritur nga një makinë tip “Benz” dhe ka hapur zjarr. Atentatori mbante në kokë një kapelë të ngjeshur te balli, me strehë të ulur dhe po ashtu xhupin e kishte ngritur deri te veshët që të mos identifikohej. Autori i ngjarjes, sipas Policisë, ka qëlluar drejt makinës ku ndodhej Aleksandër Gocaj me dy persona të tjerë. Njëri nga plumbat e ka prekur në shpatull 27-vjeçarin nga Mati, ndërsa plumbi tjetër ka depërtuar makinën dhe ka goditur Megi Jokiçin në nofull, duke i marrë jetën më pas. Pas atentatit me armë, autorët e krimit janë larguar, ndërsa policia beson se kanë qenë të paktën dy shtetas, njëri që ka qëlluar me armë dhe tjetri që drejtonte makinën. Policia e Tiranës tha mbrëmë se ka persona konkretë të dyshuar për atentatin ndaj Aleksandër Gocajt, ndërsa nuk ka motiv vrasja e Megi Jokiçit, pasi ajo është ndodhur rastësisht në vendin ku humbi jetën.
Hetimi
Veprimi i parë që policia ka bërë për zbardhjen e atentatit ndaj Aleksandër Gocajt, ku mbeti e vrarë 25-vjeçarja Megi Jokiçi, ka qenë sekuestrimi i kamerave të sigurisë pranë vendit të ngjarjes. Vendi i krimit ishte pranë një kazinoje te “Komuna e Parisit”, e pajisur me kamera sigurie. Po kështu, një bankë, fare pranë vendit të ngjarjes dhe një biznes privat disa metra më tutje, kanë qenë të pajisura me kamera sigurie. Policia ka sekuestruar kasetat me pamje filmime në mënyrë që të arrihej identifikimi i autorëve apo qoftë edhe identikiti i tyre. Sipas burimeve nga grupi hetimor, ende nuk është arritur ndonjë gjë konkrete që mund të ndihmojë policinë në identifikimin e autorëve. Hetimet intensive të kryera nga policia kanë përforcuar pistën kryesore hetimore, që dyshohet të jetë ajo e “larjes së hesapeve” mes autorëve të atentatit dhe objektivit të tyre, Aleksandër Gocaj. Ky i fundit ka qenë i shoqëruar nga nipi i Gentian Marës, i cili është i fejuari i këngëtares Ingrit Gjoni. Me makinën e Marës, tip “Toyota”, me targë TR 6116 U, Gocaj, i cili ishte pasagjer, ndodhej pranë vendit ku u vra Megi Jokiçi. Autorët, që dyshohet të kenë qëlluar me automatik tip “Kallashnikov” nga një makinë tip “Benz”, kanë plagosur në krah 27-vjeçarin Gocaj, i njohur me pseudonimin “Mente Koçi” dhe plumbat kanë vrarë 25-vjeçaren Jokiçi, që ndodhej në makinën e saj, fare rastësisht. Më pas autorët janë larguar me makinën e tyre. Policia gjithashtu ka marrë në pyetje shtetasen Jolanda K., e cila në orën 21:20 ka telefonuar në sallën operative të policisë, duke lajmësuar se një makinë tip “Toyota”, me ngjyrë gri, me targë TR 6116 U, ka goditur mjetin e saj.

arma
Arma e përdorur në ngjarjen ku gjeti vdekjen Megi Jokiçi ka qenë një Kallashnikov. Sipas pamjeve dhe dëshmive të siguruara nga grupi i hetimit, mësohet se vrasësi ka zbritur nga një makinë top Benz dhe më pas, ka qëlluar me një automatik kallashnikov në drejtim të makinës ku ndodhej Aleksandër Gocaj. Policia ka thënë se të shtënat kanë qenë me breshëri.

CEREMONIA
Megi Jokiçi, 25-vjeçarja që u vra mbrëmjen e së enjtes te “Komuna e Parisit” në Tiranë, u përcoll dje për në banesën e fundit. Kortezhi mortor, ku morën pjesë qindra njerëz, familjarë, të afërm, miq, kolegë, fqinjë dhe të njohur të stomatologes së re, u nis dje në orën 14:00 nga pallati ku banon familja e saj, pranë “Don Boskos”, drejt Varrezave të Tufinës në Tiranë. Arkivoli ku qëndronte trupi i pajetë i vajzës së re, e cila u vra në mënyrë tragjike vetëm pse u ndodh në vendin e gabuar, mbahej nga kushërinjtë e saj më të afërt, të cilët e mbajtën në duar deri te kryqëzimi pranë Zogut të Zi.

POLICIA
Në njoftimin zyrtar të shpërndarë për median paraditen e djeshme, Policia e Tiranës nuk dha shumë detaje në lidhje me ngjarjen ku mbeti e vrarë 25-vjeçarja Megi Jokiçi. “Rreth orës 21:30, në rrugën ‘Komuna e Parisit’ është plagosur me armë zjarri shtetasja Megi Millosh Jokiçi, 25 vjeçe, e cila u dërgua në gjendje të rëndë në SQU dhe rreth orës 23:50 ka gjetur vdekjen. Në vendngjarje është plagosur në dorë edhe shtetasi Aleksandër Gocaj, 27 vjeç, i cili ndodhet në SQU, jashtë rrezikut për jetën. Aktualisht po punohet për identifikimin e kapjen e autorit, si dhe sqarimin e plotë të rrethanave të ngjarjes në bashkëpunim me Prokurorinë”, thuhet në njoftimin e Policisë.

I plagosuri
“Objektivi”, ruhet me policë në spital

Vendi ku u plagos Aleksandër Gocaj dhe u vra Megi Jokiçi

Në Pavijonin e Kirurgjisë në Spitalin Ushtarak ndodhej dje i shtruar dhe jashtë çdo rreziku për jetën, vetëm me një plagë në krah, Aleksandër Gocaj, 27 vjeç, i cili ishte edhe objektivi i atentatit të së enjtes te “Komuna e Parisit”, ku mbeti e vrarë aksidentalisht 25-vjeçarja. Gocaj, i njohur edhe me pseudonimin “Mente Koçi”, duke qenë se është edhe dëshmitari kyç i ngjarjes dhe dëshmia e tij mund të zbardhte të gjithë ngjarjen, ruhet vazhdimisht nga dy punonjës policie të Komisariatit Nr. 2 të Tiranës. Burime nga Policia thanë se Gocaj mbahet vazhdimisht nën mbikëqyrje nga frika e ndonjë atentati të dytë që mund të kryhet ndaj tij nga personat që nuk e arritën dot vrasjen e tij dy ditë më parë. Por, njëkohësisht, edhe për shkak të rëndësisë që ai ka në lidhje me zbardhjen e ngjarjes dhe kapjen e autorëve. Të njëjtat burime konfirmuan se Aleksandër Gocaj është një prej miqve më të ngushtë të ish-efektivit të forcave speciale Halit (Donald) Dedja, i cili u vra në dhjetor të vitit 2010. Sipas burimeve nga Policia, Gocaj ishte krahu i djathtë i Dedjes dhe ka qenë pranë tij në shumë incidente e ngjarje të rënda që kanë tronditur Burrelin, por edhe Tiranën pas vitit 1997.

Dje, takimi i Kuliçajt me krerët e komisariateve
Analiza, vrasjet e dy femrave tronditin Policinë e Tiranës
TIRANE – Një analizë e hollësishme e punës së Policisë së kryeqytetit është mbajtur dje në Drejtorinë e Policisë së Tiranës e më pas edhe në Drejtorinë e Përgjithshme dhe në Ministrinë e Brendshme. Zv.drejtori për hetimin, Agron Kuliçaj, së bashku me shefin e hetimit të krimit të organizuar, Tonin Vocaj, kanë qëndruar dje për më se një orë në Drejtorinë e Policisë së Tiranës, në një analizë të situatës së kriminalitetit në kryeqytet. Në këtë takim është marrë në analizë edhe puna e Policisë në raport me ngjarjet e ndodhura njëra pas tjetrës të enjten. Në takim, veç drejtuesve të Policisë së kryeqytetit, kanë qenë edhe shefat e komisariateve. Pak orë pas takimit në Drejtorinë e Policisë, ku është kërkuar angazhim maksimal i policisë, mësohet se një analizë e ngjarjeve është bërë edhe në Drejtorinë e Përgjithshme të Policisë. Rreth orës 19:00, ministri i Brendshëm, Bujar Nishani, ka thirrur drejtuesit e Policisë në një raport për situatën.

Megi Jokiçi, nga bankat e shkollës te fejesa me Granitin

Të afërmit: Mbaroi Stomatologjinë me nota maksimale

Megi Jokiçi

Kishte mbaruar fakultetin me rezultate të shkëlqyera, kishte gjetur një punë të qëndrueshme në një firmë private dhe mbi të gjitha, kishte kurorëzuar ëndrrën e saj të dashurisë disavjeçare. Megi Jokiçi, vajza 25-vjeçare që u vra aksidentalisht mbrëmjen e së enjtes në rrugën “Komuna e Parisit”, duket se ka pasur gjithçka të sigurt, përveç jetës së gjatë. E ardhur prej Fierit në Tiranë prej shumë vitesh, ajo ishte vajza e madhe e familjes Jokiçi. Pasi kishte përfunduar gjimnazin, Megi kishte nisur studimet e larta në Fakultetin e Mjekësisë në Tiranë, dega Stomatologji. Këtu kishte krijuar miqësi me Granit Ribajn, student në të njëjtin fakultet, i cili më pas do të bëhej edhe i dashuri i saj. Ndërsa me përfundimin e fakultetit me nota shumë të larta, u fejuan zyrtarisht. Kjo ishte pak a shumë historia e Megit, të cilën na e rrëfyen dje të afërmit e saj, teksa ngushëllonin në familjen Jokiçi. “Prej gati 3 vitesh, Megi dhe Graniti ishin fejuar dhe po bashkëjetonin në një apartament në Laprakë. Po aty pranë, punonte Megi, në një klinikë private dentare. Po u shkonin punët shumë mbarë, të dy në të njëjtin profesion dhe kishin plane që në të ardhmen të hapnin vetë një klinikë, ku të punon që të dy. Megi ishte shumë e dashur me të gjithë, si për prindërit, për fisin, për shoqërinë. Me Granitin ishin të dashuruar që nga fakulteti dhe nuk rrinin dot pa njëri-tjetrin. Janë një moshë… Eh, ishin një moshë, tani Megi iku dhe na la”, tregon duke psherëtirë një e afërme e familjes Jokiçi, pas vizitës për ngushëllim në katin e katërt të apartamentit që ndodhet në rrugën “Don Bosko”. Babai i Megit, Milloshi, ishte krejt i pamundur për të folur për shkak të dhimbjes së madhe, por i nervozuar për mënyrën se si ia vranë vajzën, po ashtu edhe nëna e Megit, së cilës i rri pranë gjithë kohës vajza tjetër, Ingridi. Ajo është edhe vajza e vetme që i ka mbetur çiftit Jokiçi.

ETLEVA DELIA

*******************”

TIRANE- Vetëm dy ditë pas vrasjes së dy femrave në kryeqytet në Drejtorinë e Policisë së Tiranës lajmërohen ndryshime.

Është shkarkuar nga detyra e Drejtorit të Policisë së Tiranës, Sajmir Muça, dhe emërohet në vend të tij, Bernard Çaushaj, i cili deri në keto momente mbante postin e drejtorit ne Policinë e Korçës. Muça është transferuar në Akademinë e Rendit, ku është emëruar Kancelar.

Po kështu, Arjan Kurti ka zëvendësuar në postin e zëvendësdrejtorit të Policisë së Tiranës, Dorian Muçën. Ky i fundit është emëruar shef i seksionit të Pastrimit të Parave.  Gazmen Hamitaj është emëruar gjithashtu në pozicionin e zëvendësdrejtorit të Policisë së Tiranës. Gjergj Jorgo, ish zëvendësdrejtor në Policinë e Tiranës emërohet shef i Forcave Lëvizëse Operacionale.

Ylli Metko është emëruar drejtor i Policisë së Korçës. Artan Cuku emërohet drejtor i Policisë së Vlorës, ndersa me pare mbante pozicionin e drejtorit të hetimit të Pastrimit të Parave në Policinë e Shtetit.

Mësohet se ndryshimet do të prekin edhe qarqe të tjera në vend.

I është dashur të ngrihet mbi veten dhe të rrëfejë për diçka që s’e kishte imagjinuar kurrë. Një “thashethemnajë e shëmtuar”, ashtu siç ajo e quan atë rreth djalit të saj vetëm 40-ditësh, ka qarkulluar me shpejtësi këto ditë në Tiranë, duke u shndërruar në bisedën e momentit. Këngëtarja e njohur tregon se ajo është njohur me këtë sajesë vetëm dje dhe është ndier e shokuar kur mori vesh se për djalin e saj po flitej se nuk ishte i shëndetshëm. Jep këtë intervistë, ku rrëfen të vërtetën e saj për fëmijën  e saj të parë dhe dashakeqësinë e njerëzve që ndonjëherë kalojnë çdo kufi.
Prej disa ditësh qarkullon në Tiranë një thashethem shumë tronditës në lidhje me shëndetin e djalit tuaj, që sapo ka mbushur 40 ditë nga ardhja në jetë. Kur t’u bë e ditur dhe si u ndjeve?
Unë këtë thashethem e dëgjova vetëm dje dhe kam qenë e fundit që e kam marrë vesh seç kishte filluar të qarkullojë për djalin tim të porsalindur, që sapo ka mbushur 40 ditë nga ardhja në jetë. Ndihem e indinjuar dhe e shokuar njëkohësisht, pasi nuk mund ta imagjinoj se si ligësia e disa njerëzve mund të arrijë deri në këtë pikë. Mund të them nëse deri më sot më është regjur lëkura duke dëgjuar për veten thashetheme nga më të ndryshmet, nuk do ta besoja kurrë që njerëzit të kalonin çdo cak e kufi njerëzor për të sajuar diçka të tillë. Kjo dashakeqësi që ekziston mes njerëzve më ka tronditur dhe vërtet nuk arrij ta kuptoj se çfarë i shtyn persona të tillë të krijojnë një histori kaq monstruoze.
Po njerëzit e tu të afërt kanë qenë në dijeni të këtyre fjalëve më parë, si kanë reaguar?
Njerëzit e mi  të afërt e kanë dëgjuar më parë dhe e kanë mohuar, pasi janë ata që e kanë parë djalin dhe që e dinë mirë se është fëmijë plotësisht normal dhe i shëndetshëm. Ata janë kujdesur që të mos ma bëjnë mua të ditur këtë thashethemnajë, që është përhapur me shumë shpejtësi, pasi janë kujdesur të mos shqetësohem për faktin se jam lehonë dhe e ushqej tim bir me gji.
Si shkoi lindja, pasi përveç lajmit që djali juaj Dan erdhi në jetë shëndoshë e mirë, asnjë detaj tjetër nuk u pasqyrua në shtyp…
Duke marrë parasysh që jam lidhur me doktor Halim Kosovën, që në momentin e parë pasi mësova që isha shtatzënë e deri në këto momente që po flasim, mund të them se ka qenë një shtatzëni shumë e qetë dhe e ndjekur në mënyrë rigoroze nga dr. Halimi. Unë e solla në jetë djalin me lindje natyrale, me peshë 3 kg e 300 gr. Çdo gjë shkoi mrekullisht dhe në spitalin “Mbretëresha Geraldinë” jam ndier si në një hotel me shtatë yje, nën kujdesin e jashtëzakonshëm të doktorit që më sugjeroi të bëja lindje natyrale dhe të mamive që asistuan në lindje dhe që u kujdesën për fëmijën më pas.
Kanë qarkulluar po ashtu fjalë se bashkëshorti juaj ka reaguar me skena dhune, duke thyer xhamin e makinës së dr. Halim Kosovës. I kishit dëgjuar dhe këto?
Po i kemi dëgjuar, madje dhe shumë sajesa të tjera si këto në lidhje me Dr. Halimin. Por të vërtetën e dimë vetëm ne dhe mund të them se djali ynë gëzon shëndet të plotë dhe, në sajë të kujdesit të doktorit, vazhdojmë Edhe sot e kësaj dite të ruajmë marrëdhënie shumë të mirë, madje është kthyer tashmë në raport familjar mes nesh. Nuk e di e kujt ishte gjithë kjo ligësi, por e theksoj që më duket absurde kjo pjellë e fantazisë dashakeqe të një inati pa shkak, qoftë ndaj doktorit apo dhe ndaj meje.
Po dr.Halimi si reagoi ndaj këtij thathethemi, pasi në një farë mënyre mund të ketë ndikuar në prishjen e reputacionit të tij?
Natyrisht që u çudit dhe u shokua, pasi fantazia kishte arritur deri aty sa është thënë se unë kam lindur në Amerikë, pas një konflikti me doktorin etj. si këto. Megjithatë, pavarësisht çfarë janë thënë, unë kam një falënderim të veçantë për të, sepse vërtet ka qenë shumë i kujdesshëm në mbarëvajtjen e shtatzënisë sime.
Ndërkohë ka nga ata që mendojnë se ky thashethem ka dalë nga rrethi i artistëve, dhe të tjerë mendojnë se mund të ketë dalë nga rrethi i mjekëve…
Në fakt, unë s‘di të flas me siguri për këtë, por mund të them se për të sjellë në jetë fëmijën tim të parë, zgjodha mamitë me eksperiencë në vend të “room servile” të hotelerisë më të shtrenjtë (sikurse mund të jetë trendy i momentit). Megjithëse nuk mund të bëj ndryshimin ndërmjet kushteve të spitalit “Geraldina …” me hotelet me disa yje që kam pasur mundësinë të fle jashtë shtetit.
Në momente të tilla, çdokush do të donte të dinte se çfarë i shtyn njerëzit të hapin një thashethem të tillë, sidomos kur bëhet fjalë për një fëmijë të porsalindur. Keni ndonjë ide?
Nuk di të them se çfarë i shtyn të bëjnë një të tillë. Dua vetëm t’u them këtyre njerëzve se duhet të qetësohen dhe të jetojnë jetën e tyre. Unë kam 12 vjet me bashkëshortin tim, kam krijuar tashmë një familje dhe Zoti më ka falur një engjëll, për të cilin jemi shumë të lumtur. Dëshiroj shumë që njerëzit të shkëmbejnë energji pozitive me njëri-tjetrin. Pas kësaj që ndodhi, mua thjesht do më vinte vërtet keq që kur im bir të rritet, të dëgjojë se çfarë është sajuar për të kur sapo erdhi në jetë. Më vjen keq që im bir, të cilin mezi e kam pritur, ka ardhur në një botë që për fat të keq reflekton shpesh negativitet pa asnjë logjikë. Tashmë këtë sajesë do e konsideroja një lloj hajmalie, që të mos e marrin më sysh tim bir.
Kush po kujdeset për djalin dhe a ke filluar ta nxjerrësh me karrocë? Si po e jeton këtë eksperiencë të parë për ty?
Kujdesem vetë, por edhe me ndihmën e mamasë sime. Patjetër që momentet që dal me djalin janë më të bukurat për mua. Madje, mund të them që e kam nxjerrë në ambiente publike vetëm 10 ditë pasi im bir erdhi në jetë, gjithmonë në kohë me diell.
Ti i dedikove një këngë me titull “Thesari im”, ndërkohë që ishe në garë me kolegët artistë në “Kënga Magjike”. Cilëve prej kolegëve të tu artistë ua ke prezantuar djalin deri tani?
Me Aurela Gaçen takohemi dhe nxjerrim shëtitje dy bebet nga liqeni, unë djalin dhe ajo vajzën 2 muaj e gjysmë, me Rovena Dilon jemi takuar te lokali i saj, Besa Kokëdhimën jemi takuar rastësisht, ndërsa Ardit Gjebreas i kam dërguar foton e djalit.

KLOTILDA HARKA/PANORAMA/

Në komunikimin institucional, kuvend-polici të cilin “Top Channel” thotë se e ka siguruar, Komisioni për Siguri i Kuvendit të Kosovës kritikon policinë për fshehjen nga raporti të arrestimit të deputetëve të Kuvendit dhe faktin se gjatë aksionit është ndërhyrë në pronat private të banorëve të Podujevës.

Raporti i Policisë së Kosovës duhet të plotësohet me të dhëna të sakta statistikore të cilat duhet të përfshijnë:

1. Numrin dhe natyrën e lëndimeve të pjesëtarëve të PK-së dhe protestuesve.

2. Arrestimin e deputetëve të Parlamentit të Kosovës.

3. Arsyetimin për ndërhyrje në pronat private.

4. Lëndimi i gazetarëve.

5. Numrin e rasteve nën hetim lidhur me ngjarjet e 14 janarit.

Sa i përket ndërhyrjes fillestare ndaj protestuesve, policia në raportin e saj insiston se ishin protestuesit ata të cilët provokuan të parët policët me gurë. Ndërkohë që kamerat televizive kanë dëshmuar për të kundërtën.

“Përpos bllokimit të tërësishëm të rrugës protestuesit kanë filluar t’i provokojnë zyrtarët policorë e pastaj të bëhen të dhunshëm duke hedhur mjete të forta mbi pjesëtarët e PK-së dhe si pasojë e sjelljeve të tilla dy zyrtarët e parë nga radhët e policisë së rendit pësuan lëndime. Edhe përkundër përpjekjeve dhe thirrjeve të PK-së për t’ju shmangur veprimeve të dhunshme, situata u tensionua dhe u plotësuan kushtet ligjore për domosdoshmërinë e përdorimit të forcës legjitime me intervenimin me njësitë e rendit”.

Komisioni për Siguri përveç se i kërkon policisë një raport më të detajuar për lëndimet e policëve, protestuesve dhe gazetarëve, i rekomandon policisë të mbajë trajnime shtesë për menaxhimin e turmave.

Në raportin që policia i ka dërguar Kuvendit është evidentuar se njësitë e policisë ditën e 14 janarit kanë pasur probleme në komunikim përmes radio lidhjeve.

Ndërsa vihet në pah edhe fakti që policët nuk gëzojnë sigurim shëndetësor pasi siç thuhet në raportin policor, policët e lënduar duhet të shërohen me të ardhurat e tyre.

Ndërkohë që kostoja financiare për menaxhimin e situatës ditën e 14 janarit i ka kushtuar buxhetit të policisë rreth 28 mijë euro.

Në këtë pikë Komisioni për Siguri i Kuvendit të Kosovës i rekomandon policisë që të përmirësojë nivelin e komunikimit përmes pajisjeve teknike, ndërsa nga organet përgjegjëse: Inspektorati Policor i Kosovës dhe Drejtoria për Standarde Profesionale kërkon që të publikojë rezultatet e hetimeve. /tch/

Sipas një dokumenti që ka siguruar “Zëri”, ku janë të radhitur kandidatët në bazë të pikëve që kanë marrë gjatë intervistimeve në vitin 2009 për pozita të ndryshme në shërbimin diplomatik e konsullor, shumë prej tyre që kanë marrë pikë minimale janë përzgjedhur si pjesë e stafit diplomatik e konsullor nëpër ambasada të ndryshme, derisa kandidatë me pikë më të larta kanë rënë nga “kombinimi”.

Madje, Komisionit Intervistues të MPJ-së i kanë mjaftuar vetëm 4.3 pikë që ka marrë Agron Smakiqi, që atë ta bëjë sekretar të parë në Ambasadën e Kosovës në Shkup. Me vetëm pak pikë më shumë sesa Smakiqi, me 7.3 pikë, Burim Qorri është emëruar si sekretar i parë në Ambasadën e Kosovës në Tiranë.

Përzgjidhen të dobëtit, injorohen të suksesshmit

Në saje të punës “profesionale” dhe “korrekte” që ka bërë komisioni i atëhershëm që  përbëhej prej Qerim Qerimit- këshilltar i parë i ish-ministrit Hyseni, Fitim Gllarevës- ish- sekretar permanent në MPJ, Lulzim Mjekut- drejtor i Drejtorisë së përgjithshme në MPJ, Besfort Rrecajt- këshilltar i ish-zëvendësministres së Jashtme, Vlora Çitaku, Suzana Krasniqit- nga Departamenti Ligjor i MPJ-së dhe Melhin Mahmutit- poashtu nga MPJ, sot Republika e Kosovës ka dhjetëra zëvendëskonsuj që gjatë intervistimit nuk janë treguar edhe aq të suksesshëm…Jeton Llapashtica/zeri/

“Para dy jave Daut Haradinaj ka zhvilluar një takim privat me kryetarin e LDD-së Nexhat Daci, ku ky i fundit ka shprehur interesim që LDD-ja të bashkohet me AAK-në, në mënyrë që të jenë të gatshëm para zgjedhjeve parlamentare. Megjithatë, nuk është marrë asnjë vendim. Pritet që edhe në të ardhmen të ketë bisedime për këtë çështje”, ka thënë ky burim.
Mirëpo, as zyrtarët e AAK-së e as ata të LDD-së nuk e kanë konfirmuar një takim dhe një iniciativë të tillë.

Letra e botuar exkluzive ne kosovalbaner me 27.10.2011

“Dëshmi ose padi 29.12.2010. Këtë padi po e bëj me shkrim kundër prokurorit italian Mauricio dhe dy agjentëve të sigurimit për mbrojtjen e dëshmitarit, shefi Donalld nga Britania dhe Hansi nga Gjermania. Zotëri prokuror, hetues-Prishtinë, ti më bëre jo krim, por masakër psikike në tërë fëmijët dhe gruan time. Por, ti mua s’mund të më blesh kurrë për një milion euro të juaja dhe burgun që ma falni çka kam bërë, apo për disa dëshmi që t’i kam nënshkruar pa mi përkthyer”, ka shkruar në ditarin e vet dëshmitari “X”, transmeton “Epoka e Re”.

Dëshmitari “X” në ditar tregon se disa herë është marrë në pyetje nga prokurori Salustro dhe për këtë i ka shkruar datat nëpërmjet një tabele.

“Nënshkrova pa ditur se çka shkruhet në to, nuk mu përkthyen. Ka mundësi me qenë edhe data të tjera, por me këto i kam nënshkruar pa mi përkthyer fare. Kam dhënë dëshmi dëshmi në podrumin e I. Bajraktari në Taukbaqe në Prishtinë dhe i sëmurë prej plagëve”, shkruhet në dituar, duke treguar se pyetjet që i janë bërë kanë qenë jashtë normave ligjore.

“Këto pyetjen kanë qenë jashtë normave ligjore. EULEX-i është vetë mbi ligjin”.

Po ashtu, dëshmitari “X” shkruan në ditarin e vet për presionin që ka pasur kur e kanë strehuar në Maqedoni.

“Më quat në Maqedoni për tri javë, u bënë tre muaj. Ma ndërruat emrin dhe mbiemrin, pasaportën Azem Bytyqi, e na latë pa asnjë dokument, që nëse vritna mos me u dit nga jam, por s’mund e bëtë këtë”, ka shkruar “X”.

“Unë po ju them se të gjitha deklaratat e mia që gjenden para teje janë të pavlerë. Fëmija i dëshmojnë të vetat se çka kanë vujt. Këtë përgjegjësinë time, që më shtyre të ndahem nga familja dhe jeta ime me një presion të papërballueshëm, janë këta Mauricio prokurori, Donalldi, Hansi, psikologu Orhani”.

Dëshmitari “X” ka shkruar se ditarin e vet edhe për ditët që i ka kaluar në Gjermani te vëllezërit e vet. Ndërsa, e ka akuzuar misionin e EULEX-it se ka shkelur marrëveshjet me të kur ka qenë pyetja për t’ia siguruar banimin në Gjermani.

“Nëse i dal ndonjë automjeti përpara ju lus me i kërku falje dhe të jetë i lirë edhe nga ana ligjore. Përgjegjësinë e marrtë EULEX-i në krye me prokurorin Mauricio dhe bosi i sigurimit Donalldi”, ka shkruar në ditarin e vet dëshmitari “X”.Video te lidhura me deshmitarin “X”

Me shumë rreth letrave te deshmitarit “x”

Foto: Getty Images

Presidenti i Serbisë duket se nuk e harron zanatin e vjetër që kur bën propozime, gjithmonë kërkon vetëm të fitojë e asnjëherë të ofrojë diçka si rikthim. Dokumenti, që ka kohë që po përflitet në opinion si dokumenti i 4 pikave të presidentit serb, kërkon zgjidhje që u konvenojnë serbëve, ndërsa nuk ofron asgjë për koncesionet, që sipas dokumentit, duhet të bëjnë shqiptarët.

E vetmja gjë që tingëllon si ofertë e udhëheqësit serb është që në këmbim të këtyre pikave, “Serbia nuk do ta pengojë perspektivën evropiane të askujt” duke mos e përmendur fare nëse fjalën e ka për Kosovën apo cilin vend tjetër.

Në fakt tre nga katër pikat e propozuara nga Boris Tadiq kanë ngjashmëri të madhe me ato që ofrohen për serbët në Pakon e Ahtisaarit. Sidoqoftë, pika e tretë flet për veriun e Kosovës përmes të cilës kërkohet krijimi i entiteteve të veçanta për komunat e veriut, e të cilat së bashku do të quheshin edhe zyrtarisht si “North of Kosovo” apo “Veriu i Kosovës”…

Por sekretari i përgjithshëm i NATO-s ka rikujtuar se situata në veri të Kosovës duhet të zgjidhet dhe ajo situatë nuk mund të tejkalohet vetëm me mjete ushtarake. „Duhet një zgjidhje politike e cila duhet të negociohet për të siguruar një zgjidhje afatgjatë, nga e cila do të përfitonin të gjitha palët“, ka thënë sekretari i përgjithshëm i NATO-s.

Aktualisht, sipas të dhënave të fundit të NATO-s, misioni i KFOR-it ka gjithsej 5.790 pjesëtarë. Shqipëria në KFOR ka 4 ushtarë. Edhe gjashtë vende të tjera të NATO-s kanë më pak se nga 10 ushtarë./koha/