Zbulohet një vendstrehim i përdorur nga Mladic

Autoritetet serbe zbuluan në Beograd një apartament që mendohet se përdorej nga i shumëkërkuari për krime lufte, Ratko Mladic- njoftoi të mërkurën “Blic”.

E përditshmja serbe njoftoi gjithashtu se kasetat me bisedat e regjistruara nga Mladici të zbuluara gjatë një kontrolli të shtëpisë së tij në Beograd, tregonin se ish-presidenti serb Slobodan Milosevic i kishte kërkuar Mladicit të bashkëpunonte me Gjykatën Penale Ndërkombëtare (TPI).

Sipas burimit të së përditshmes, njëra nga bisedat telefonike të regjistruara nga Mlladici ka qenë me presidentin e atëhershëm të Malit të Zi, Momir Bulatovic, i cili i transmetonte kërkesën e Milosevicit për të dërguar në TPI zëvendësin e tij, Zdravko Tolimir.

Bulatovic, i kontaktuar nga e përditshmja, konfirmoi se ka biseduar disa herë me Mladicin në vitin 1996, por shtoi se nuk mund t’i mbante mend këto biseda të veçanta lidhur me Tolimirin.

Sipas mediave lokale, regjistrimet e Mladicit, CD dhe kaseta, përmbajnë biseda të Mladicit me Karadzicin, por edhe me presidentin jugosllav të asaj kohe, Sllobodan Milosevic, shefin e Shtabit të Përgjithshëm të ushtrisë jugosllave Momcilo Perisic dhe me shefin e zbulimit serb Jovica Stanisic, në kohën kur ata ishin në detyrë.

Ata të gjithë janë gjykuar ose janë nën gjykim, për rolin e luajtur në konfliktet që shkatërruan ish-Jugosllavinë në vitet 1990 dhe sollën shpërbërjen e saj.

Regjistrimet e Mladicit u sollën si prova në procesin kundër Karadzicit që vazhdon në TPI, por nuk janë bërë publike nga gjykata. /GazetaStart/