Vrasja në Mitrovicë – arrestohet një polic i Kosovës me dokumentacion të MUP-it

Hetimet për vrasjen e Hakif Mehmetit kanë drejtuar policinë në zbulimin e një prej disa kolegëve të tyre serbë që punojnë edhe për Ministrinë e Punëve të Brendshme të Serbisë. Lubisha Vujinoviq, pjesëtar i Policisë së Kosovës, është arrestuar të martën në mëngjes nga kolegët e tij hetues, pasi që në lokalin e tij janë gjetur dokumente që tregonin lidhjet e tij me MUP-in e Serbisë. Lajmin e ka konfirmuar për Kohën Ditore zëdhënësi i Policisë Rajonale të Mitrovicës, Besim Hoti, i cili ka shpjeguar se Vujanoviqit i janë gjetur distinktivi i MUP-it të Serbisë dhe kartela identifikuese, që e dëshmojnë veprimtarinë e tij të dyfishtë.
Në fakt, hetimet për vrasjen e 31-vjeçarit Hakif Mehmeti të martën e shkuar në mbrëmje, në Kodrën e Minatorëve në Mitrovicë, kishin shpënë në zbulimin e veprimtarisë ilegale të policit serb të Kosovës. Sipas Hotit, para se të vritej Mehmeti kishte qëndruar në lokalin e Vujinoviqit, ndërsa ky i fundit e kishte dërguar viktimën në spital, pasi ishte shtënë në drejtim të tij nga një veturë në lëvizje.
“Një serb është ndaluar për hetime të mëtutjeshme, pasi i njëjti është dhe ka qenë pjesëtar i policisë, por në pronësi të tij janë gjetur dokumente që dëshmojnë se i ka shërbyer MUP-it të Serbisë, dhe mbi këtë bazë është bërë arrestimi. Ky është pronari i lokalit ku i ndjeri ka qenë para se të vritej”, ka thënë Hoti
Burime të besueshme të gazetës kanë bërë të ditur se Vujinoviq mbante një klub të bilardos dhe shoqërohej shumë me të ndjerin Hakif Mehmeti, i njohur edhe me nofkën Kika. I ndjeri Mehmeti ishte grindur me Neno Mariqin dy javë më parë, rreth instalimeve për ujë në Kodrën e Minatorëve, ka thënë ky burim. Ai është vrarë me armë zjarri afër shtëpisë së tij, më 7 shtator, rreth orës 21:40 minuta.
Dëshmitarët i kishin thënë policisë se dorasit kishin shtënë nga një veturë e bardhë, e tipit “Golf 3”, pa targa të regjistrimit, e cila ndërkohë ishte gjetur e djegur tërësisht në një rrugë rurale të fshatit Kremeshtak të Komunës së Zveçanit, me qëllim të humbjes së gjurmëve.
Zëdhënësi Hoti ka shpjeguar se Vujinoviq ishte kontaktuar nga policia për shkak se ka qenë ndër personat e fundit që kanë kontaktuar me Mehmetin para se ai të vritej, e po ashtu edhe e kishte dërguar viktimën në spital.
Në momentin që policët hetues kishin hasur në dokumentacionin që kishte Vujinoviq, e kishin ndaluar këtë të fundit për të nisur procedurat fillimisht disiplinore e më pas edhe penale.
“Ai është ndaluar për shkelje të parimeve dhe të procedurave të policisë dhe fillimisht është suspenduar pas rekomandimeve të Inspektoratit të Policisë së Kosovës, ndërsa i është shqiptuar edhe masa e ndalimit policor”, ka thënë Hoti.
Veprimtaria e dyfishtë e pjesëtarëve serbë të Policisë së Kosovës nuk është një dukuri e re. Shumicës së pjesëtarëve serbë të Policisë së Kosovës i ishin gjetur kohë më parë edhe listat e pagave që marrin nga Qeveria e Serbisë. Ndërkohë, dy muaj më parë, në veri të Mitrovicës, njësitet speciale të policisë i ishin vënë pas një personi, të cilit i kishte rënë distinktivi i MUP-it të Serbisë duke ikur nga policia. Ai nuk ishte kapur nga policia atëherë dhe ende nuk është dhënë asnjë informacion nëse hetuesit kosovarë kanë rënë në gjurmë të të dyshuarit.