Pritet shkarkimi i ministrit serb Jeremic ?

Shtypi beogradas paralajmëron një zhvillim dramatik në Beograd. Sipas të përditshmeve serbe, ministri i jashtëm Vuk Jeremic mund të shkarkohet nga posti i tij sapo të kthehet nga vizita në New York.

E përditshmja serbe Danas, thirret në burime të Presidencës serbe dhe deklaron se presidenti serb Boris Tadic do të bisedojë me ministrin e jashtëm Jeremic për mënyrën e largimit të tij nga ky post.

Ndryshe, dorëheqja e ministrit të jashtëm serb është kërkuar edhe nga disa parti politike në Beograd, sidomos pas disfatës së Serbisë në Gjykatën Ndërkombëtare të Drejtësisë, me ç’rast ishte kërkuar mendimi i këtij institucioni lidhur me ligjshmërinë e shpalljes së pavarësisë së Kosovës.

Ndërkaq, mbrëmë mbledhja e Asamblesë së Përgjithshme të Kombeve të Bashkuara, në të cilën është diskutuar rezoluta për Kosovën është shtyrë për disa orë, pasi Serbia insistonte të largohen nga salla anëtarët e delegacionit të Kosovës.

Vuk Jeremic kërkonte që para se të nis shqyrtimi i projektrezolutës së BE-së dhe Serbisë për Kosovën, të largohen nga salla presidenti i Kosovës, Fatmir Sejdiu, kryeministri Hashim Thaçi dhe ministri i Jashtëm, Skënder Hyseni edhe pse çështja që diskutohej kishte të bënte pikërisht për Kosovën.

Megjithë shtyrjen e mbledhjes dhe insistimin e ministrit serb për largimin e delegacionit kosovarë, një gjë e tillë nuk ka ndodhur.

Presidenti Sejdiu, kryeministri Thaçi dhe ministri i jashtëm Hyseni dhe anëtarë të tjerë të delegacionit të Kosovës nuk janë larguar dhe kanë qenë të pranishëm në sallën e mbledhjeve të Asamblesë së Përgjithshme.

Zyrtarë të Asamblesë së Përgjithshme, duke iu përgjigjur pyetjes së Jeremicit rreth pranisë së delegacionit kosovar, theksuan se janë mysafirë të disa shteteve anëtare dhe si të tillë mund të qëndrojnë në sallën e mbledhjeve të Asamblesë së Përgjithshme