MPJ refuzon që Pacolli të jetë Konsull Nderi i Maldiveve

Ministria e Jashtme e Kosovës ka refuzuar kërkesën e Republikës së Maldiveve që Behgjet Pacolli të jetë Konsull Nderi i këtij shteti në Prishtinë. Lideri i AKR-së thotë se ky post nuk do ta përmirësonte apo keqësonte jetën e tij, por habitet nga pengesa e MPJ-së.
Ministria e Punëve të Jashtme e Kosovës është e vendosur që në vazhdimësi të mos e njohë kontributin e liderit të AKR’së, Behgjet Pacolli.
Përveç që e mohon dhe e nënvlerëson lobimin e biznesmenit të njohur, tani së fundi edhe e pengon atë në grada nderi.
Muaj më parë, shteti i Maldiveve, i cili e ka njohur pavarësinë e Kosovës, i ka dorëzuar një letër kërkesë Ministrisë së Jashtme në Prishtinë, nëpërmjet të cilës ka kërkuar konfirmimin që Behgjet Pacolli të jetë Konsull Nderi i Maldiveve në Kosovë.
Kjo kërkesë, sipas Express, ndodhet në zyrat e MPJ’së.
Përgjigje në të nuk është dhënë asnjëherë.
Ministri Skënder Hyseni nuk ka pranuar, të paktën ende jo, që Behgjet Pacolli të marrë këtë titull në Prishtinë.
Megjithëkëtë, kjo nuk e shqetëson shumë Pacollin, njërin nga përfaqësuesit e opozitës. Por ai nuk e fsheh dëshirën që ta mbajë edhe këtë gradë në Republikën e Kosovës.
“Shteti i Maldiveve para disa muajve ka dërguar një kërkesë në Ministrinë e Punëve të Jashtme të Kosovës dhe kanë kërkuar që unë të jem Konsull Nderi i Maldiveve në Kosovë. Por, Ministria e Punëve të Jashtme e Kosovës e ka refuzuar këtë kërkesë dhe deri tani nuk ka dërguar asnjë lajm”, ka konfirmuar Pacolli për Express.
Ai thotë se marrja e këtij epiteti as nuk ia keqëson, e as nuk ia përmirëson jetën.