Birra e shtrenjtë te Rovena, dështon koncerti

Fundjavën e kaluar, pikërisht më datën 29 gusht, këngëtarja shqiptare Rovena Stefa organizonte shown e fundit të saj të mbylljes së sezonit veror të këtij viti, për të përshëndetur kosovarët nga Peja, Gjakova, Prishtina, Prizreni…, duke kënduar vetë Rovena, në klubin e saj, për të gjithë ata që do të linin pushimet. Ta merrte mendja se për një këngëtare si Rovena klubi do të ishte mbushur plot me njerëz. Por, sa hyje te një portë e sajuar, ku të priste e motra e Rovenës, të shfaqej një vend gjigant, me posterë të Rovenës gjithandej, por që gjithë e gjithë brenda klubit, ishin vetëm nja 20 a 30 vetë. Epo ndoshta me kohën do të vinin, dhe ky ishte mendimi i parë që të vinte në mend. Rovena këndonte e këndonte pa pushim, këngë nga Shqipëria e këngë nga Kosova, por askush nuk dukej te porta. Dhe, me vete pyet se pse. Por sa përfundon birrën e parë, kërkon faturën: e ç’të shohësh, një birrë te klubi i Rovenës kushton jo pak, por plot 7000 lekë, dhe bëhej fjalë për të njëjtën birrë që me shumicë e gjen vetëm 700 lekë të vjetra. Sigurisht dikush do të thotë se është lokali i saj, zgjedhje e këngëtares, dhe kush do ta dëgjojë live duke kënduar, do të duhet të pranonte edhe çmimet e kripura të klubit. Por njerëzit, që sot nuk janë “budallenj”, e kishin bërë zgjedhjen e tyre, shkruan Bluetooth.